Matul din is-sena, bl-għajnuna tal-Assoċjazzjoni Wirt il-Kalkara, il-Patrijiet Kapuċċini tal-Kalkara implimentaw proġett edukattiv fil-klassijiet tal-katekiżmu fil-kumpless tal-Kunvent tal-Kapuċċini tal-Kalkara.
Sabiex jiġu implimentati metodi ta’ tagħlim aktar interattivi, ġew installati monitors f’ħames klassijiet tal-katekiżmu. Dawn jinkludu aċċessorji bħall-HDMI cables u brackets biex jitwaħħlu mal-ħajt u dan sabiex ikun jista isir użu minn filmati interattivi. Dan il-metodu huwa ta’ benefiċċju partikolarment għat-tfal li jistgħu jsibuha diffiċli biex jipproċessaw informazzjoni awdjoviżiva jew astratta.
Barra minn hekk, ġew installati whiteboards f’ħames klassijiet tal-katekiżmu. Dawn ser jiffaċilitaw komunikazzjoni iżjed ċara u effettiva, jinkoraġġixxu parteċipazzjoni attiva u jsaħħu l-kollaborazzjoni. Dawn ser jgħinu wkoll lill-istudenti jivviżwalizzaw dak li qed jingħad fil-lezzjoni u b’hekk titjieb il-komunikazzjoni ġenerali.
Inxtara wkoll projector li se jitwaħħal fis-Sala tal-Kunvent tal-Kapuċċini. Dan ser jgħin biex il-kontenut viżiv jista’ jintwera fuq skala akbar u jkun viżibbli b’mod ċar għal udjenzi kbar. L-għan tiegħu hu li jsaħħaħ l-impenn waqt konferenzi, seminars, workshops u wirjiet permezz ta’ preżentazzjonijiet dinamiċi u viżwalment attraenti.
Dan il-proġett sar mill-Assoċjazzjoni Wirt il-Kalkara b’kollaborazzjoni mall-Patrijiet Kapuċċini Kalkara u huwa kofinanzjat minn fondi tal-Unjoni Ewropea taħt il-programm LEADER 2014 – 2020.
